Физика пәнінің мұғалімі Сагидуллина Лаура Болаткалиевна 8 «Ә» сыныбында физика пәнінен ашық сабақ өткізді

Сабақ 8.4.2.7 және 8.4.2.8 оқу мақсаттарына сай, бірізді әрі мазмұнды өтті. Үй тапсырмасын сұрауда мұғалім кедергінің мағынасын, Ом заңымен байланысын және өлшем бірліктерін қысқаша қайталатып, ұсақ қателерді дереу түзетті – бұл жаңа тақырыпқа  көпір болды. Жаңа білім бөлімінде кедергі «токқа материалдың қарсы әсері» ретінде нақты түсіндірілді, өлшем бірлігі ом екені айқын аталды, ал меншікті кедергі материалға тән шама екені өмірлік мысалдармен байланыстырылды. Оқушылар есеп шығарғанда меншікті кедергі формуласын (R=ρ·L/S) дұрыс қолданып, берілгендерді SI жүйесіне түрлендіру, формуланы түрлендіру және жауапты бірлікпен жазу дағдыларын көрсетті. Саралау сақталды: түрлендіруге қиналғандарға тілдік тірек пен үлгі-қадамдар берілді, ал жылдам меңгергендерге әртүрлі материалдардың кестесімен салыстырмалы талдау ұсынылды. Қалыптастырушы бағалау қысқа тест және дескрипторлы тексерулер арқылы өтіп, нәтижелері бірден талқыланды. Сабақ соңындағы рефлексия Wordwall платформасында ұйымдастырылды: терминдер мен белгілерді сәйкестендіру тапсырмалары түсінуді бекітіп, қателесу нүктелерін нақты көрсетті. AnswerGarden арқылы «қай тұста қиналдың?» деген сұраққа бір-екі сөздік жауаптар жиналды. Сыныптағы ахуал қолайлы, оқушылар жұппен және топпен белсенді жұмыс істеді.Сабақ барысында оқушылар кедергінің физикалық мағынасын сенімді түсіндіріп, есеп шығаруда меншікті кедергі формуласын орынды пайдалана алды; сабақта цифрлық кері байланыс құралдары қолданылды.